“Мицүбиши Азийн Хүүхдийн Эникки Фестиваль” 2024-2025 Хүүхдийн зургийн уралдааны үндэсний шагнал гардуулах ёслолын арга хэмжээ 2025 оны 11 дүгээр сарын 22-ны өдөр амжилттай болж өндөрлөлөө.

​

  Энэ жилийн уралдаанд нийт 22 авьяаслаг сурагч шалгарсан бөгөөд тэд Монголынхоо ахуй соёл, хайрт гэр бүл, байгаль дэлхий, өөрсдийн мөрөөдөл, баяр баясал, нөхөрлөлийг зураг болон богино өгүүлэмж бүхий эсээгээр илэрхийлж сэтгэл татам бүтээлүүдийг туурвисан байна.

​

  Эникки Феста уралдаан нь 6-12 насны хүүхдүүдийн сэтгэлгээ, аж төрөхүй, үнэт зүйлсээр илэрхийлэх өвөрмөц талбар нь болж байдаг бөгөөд олон орны хүүхдүүдийн уран бүтээлүүдээр дамжуулан харилцан ойлголцол, соёлын солилцоог дэмжихэд чиглэсэн олон улсын ач холбогдолтой хөтөлбөр билээ.

​

  Шагнал гардуулах ажиллагааг нээж МУСГЗ, Н.Уртнасан нээж үг хэлсэн бөгөөд уралдаанд идэвхтэй оролцож шагналын эздээр шалгарсан хүүхдүүдийнхээ хөдөлмөр бүтээлийг бахархалтайгаар онцлон тэмдэглэж баяр хүргэлээ. Түүнчлэн багш нарын төлөөлөл, эцэг эхчүүд оролцож, сурагчдын бүтээл туурвих үйл явцад хэрхэн дэмжлэг үзүүлдэг тухайгаа хуваалцсан юм.

​

  Энэ удаагийн Гранпри шагналын эзнээр “Шинэ Монгол Харүмафүжи” сургуулийн сурагч Мөнхзулын Биндэрьяа шалгарсан бөгөөд энэ оны 8-р сард Япон улсад зохион байгуулагдсан Гранпри шагналтнуудад зориулсан тусгай хөтөлбөрт амжилттай оролцоод ирсэн юм. Шагнал гардуулах үйл ажиллагааны үеэр Биндэрьяа охин Гранпри шагнал хүртэж Япон улсын хөтөлбөрт хэрхэн оролцсон тухай сэтгэгдлээ хуваалцаж бусад оролцогчдод урам зориг өгсөн юм.

​

  Шагнал гардуулах арга хэмжээний үеэр Монголын Хүүхдийн ордны бүжгийн дугуйлангийн бүжигчин охин Ц.Сорхугтани шагналт байрын эзэн хүүхдүүдэд баяр хүргэж Монгол ардын уламжлалт бий биелгээ бүжгээр мэндчилгээ дэвшүүллээ.

​

  Энэхүү зургийн уралдааныг Монгол улсад 1993 оноос хойш тасралтгүй зохион байгуулж ирсэн бөгөөд хүүхдийн сэтгэлгээ, уран бүтээлийн илэрхийллээр дамжуулан соёлын солилцоог дэмжих, тэдний дотоод ертөнцийг олон нийтэд таниулахад чухал үүрэг гүйцэтгэж байна.

​

  Эникки Феста уралдааныг Япон улсын Мицубишигийн Олон Нийттэй Харилцах Хороо, Ази-Номхон далайн ЮНЕСКО-ийн клуб, нийгэмлэгүүдийн холбоо, ЮНЕСКО-ийн Клуб Нийгэмлэгүүдийн Японы Үндэсний Холбооны дэмжлэгтэйгээр ЮНЕСКО-ийн Батламжит Байгаль, Соёлын Өвийг Хамгаалах Сан Монгол улсдаа ийнхүү зохион байгууллаа.